БиХ: Поднесено обвинение за злосторство во село со српско население

Обвинителство на БиХ, во вторникот подигна обвинение против Нехру Ганиќ, за воени злосторства извршени над жртви од српска националност, во селото Чемерно, општина Илијаш, во близина на Сараево.

Ганиќ е обвинет за командна одговорност. Тој, според наводите во обвинението, како командант на ТО Бреза и надреден командант во ТО Какањ и Бреза, знаел за нападот врз селото Чемерно, кој за цел имал прогон на српското население, со убиства и со уништување и палење на српскиот имот и објекти.

Ганиќ е обвинет дека како командант, не го спречил извршувањето на злосторствата, ниту пак презел мерки за гонење и казнување на сторителите.

Нападот на селото Чемерно бил извршен на 10 јуни 1992 година. Во него се убиени 30 лица, и мажи и жени, а дел од нив биле осакатени.

Во нападот куќите и имотот биле уништени, а селото било ограбено и запалено.

Ганиќ е обвинет за воени злосторства над цивили и воени затвореници, како и за кршење на законите и обичаите на војување.

За воени злосторства извршени во Чемерно во февруари беа обвинети 11 поранешни војници на ТО и полицајци.

Нивното судење сѐ уште не започнало, бидејќи обвинителството на БиХ најави нови обвиненија.