Репортажи

На студентите им се слушна гласот против екстерното тестирање

Околу 200 студенти се собраа пред Ректоратот при Универзитетот „Св.Кирил и Методи“ и побараа поддршка за укинувањето на екстерното тестирање што го предлага Министерството за образование

„Ние имаме само една книшка – се вика индекс!“, „Не го силувајте образованието, и онака е истрауматизирано“, „Образованието е право, а не привилегија“ беа само дел од транспарентите кои в раце ги држеа студентите на денешниот протест против екстерното тестирање. Тие велат дека имаат поддршка од своите професори, а денеска побараа поддршка и од Сенатот, кој во тоа време одржуваше седница.

Денешниот собир беше организиран од неформалната иницијатива на студенти „Студентски пленум“.

eksterno1

Со извикување пароли „Доста беше молк“, студентите се обратија до Сенатот, за да застане зад нив во барањата да се укине предлогот на Министерството за екстерно тестирање.

eksterno2

Дел од студентите присуствуваа на седницата на Сенатот, а останатите чекаа пред зградата на Ректоратот. Некои од нив ни изјавија дека се задоволни од одѕивот и дека конечно покажале единство.

eksterno3

Транспарент се најде и во рацете на споменикот на Кирил и Методиј.

eksterno4

„Најавената реформа се коси со автономијата на Универзитетот и е сосема непотребна“, велат студентите.

eksterno5

Ректорот Велимир Стојковски изјави дека Сенатот не може да заземе став околу екстерното тестирање затоа што не добиле ништо на писмено од Министерството за образование.

eksterno6

Студентите велат дека нема да се откажат од своите барања и ќе продолжат со натамошни активности. Тие не прифаќаат воведување екстерно оценување бидејќи сметаат дека тоа ја загрозува автономијата на универзитетот.

Нивната наредна средба е закажана за вторник.