Од една навидум обична средба на филмска проекција, идејата за студентско организирање прерасна во Пленум и синоним за тоа што значи критичка мисла, студентска енергија и бунтовност за правата на младите генерации.
Грација Атанасовска, студентка на Филолошкиот факултет, за БИРН ги раскажува зачетоците на Студентскиот пленум | Фото: M. Јордановска
Првата средба на која се зачнале почетоците на Студентскиот пленум била една проекција на филм што се емитувал на Филолошкиот факултет во Скопје, ни раскажува Грација Атанасовска, студентка од трета година на Филолошкиот факултет, која е дел од Студентскиот пленум.
Со неа седнавме на кафе-муабет за да ни ги раскаже зачетоците на Пленумот, кој стана синоним за студентско движење и го покажа единството на младата академска популација во земјава каквошто досега не е видено.
Ја замоливме да ни ја долови атмосферата за време на подготовките на протестите, идеите за содржината на транспарентите и за нивните понатамошни мерки што ќе ги преземат во знак на револт против измените на Законот за високо образование, ограничувањето на автономијата на Универзитетите и воведувањето државен испит за студентите.
„За време на проекцијата на филмот, не се познававме сите. Ама почнавме муабет околу ситуацијата во земјава, па го зачнавме проблемот околу најавата на измените во Законот за високото образование и така се отвори дискусија. Веднаш се почувствува една бунтовна енергија меѓу студентите и така, всушност, почна сè“, вели Атанасовска.
Првата средба на студентите беше пред платото на УКИМ. Тие очекувале да се појават дваесетина луѓе, ама се појавиле стотина. Бројката ги изненадила.
„Тогаш сфативме дека има големо незадоволство за најавените законски измени и воведувањето државен испит, како и за многу други студентски проблеми кои се провлекуваат со години“, раскажува младата студентка.
Подготвката на еден од студентските протести | Фото: Студентски пленум
Местата каде што ги одржуваат состаноците, Студентскиот пленум ги држи во тајност, но студентите преку социјалните мрежи навремено се известувани каде и кога се среќаваат. Сите овие активности им одземаат многу време, велат, па затоа „многу испити им останале неположени“ .
Местата на состанување се држат во тајност | Фото: Студентски пленум
„Се состанувавме два пати неделно и понекогаш се задржувавме по 5 часа. Секој имаше по некоја идеја, секој сакаше да предложи нешто. Понекогаш имаше и расправии, ама се решаваа брзо“, велат од Пленумот.
Пленумците се хоризонтално организирани, меѓу нив нема хиерархија – нема претседател, нема организатори туку само координатори на факултетите кои се менуваат на определено време. На секој состанок има модератор и записничар, за да се известат останатите членови за договорените активности.
Сепак, зависно од тоа на кој факултет студираат, произлегуваат и нивните активности во рамките на Пленумот. Па така, студентите на Правниот факултет ги читале законите и предлагале измени, а студентите на Филолошкиот факултет ги пишувале соопштенијата и ги лекторирале.
„Не можеме да дозволиме одредено соопштение за јавноста да има печатни или граматички грешки“, низ смеа ни вели Атанасовска.
Зависно од тоа на кој факултет студираат и за што се стручни, така ги делат и своите активности | Фото: Студенски пленум
Наспроти обвинувањата дека се партиски испостави или во најмала рака злоупотреби од страна на опозицијата, тие се децидни дека никогаш не биле исконтактирани од ниту една политичка партија. Но, притисоци има, велат, а најизложени се студентите сместени во студентските домови.
„На некои студенти од домовите им беше страв да се појават на протестите за да не го загубат местото во студентскиот дом. Ним им беше најтешко, па ги разбиравме зошто не доаѓаат, иако ни пружаа поддршка“, раскажува Атанасовска.
Студентскиот пленум нема да згасне, уверени се пленумците. Се подготвуваат нови, вонинституционални мерки против државниот испит кои сè уште не ги соопштуваат во јавноста.
Иако пропуштиле да положат дел од испитите од последната испитна сесија, студентите се задоволни од она што досега го постигнале | Фото: Студентски пленум
„Иако по масовните протести бевме навистина изморени, неспиени и исцрпени, сега собираме нови сили. Кон почетокот на февруари ќе се знаат понатамошните дејствувања. Пленумот нема да згасне. Ние ќе дипломираме, но ќе оставиме наследство. Целта ни е кај другите генерации да се создеде свест за проблемите во општеството и за развој на критичката мисла“, смета Атанасовска.
Грација Атанасовска на еден од студентските протести | Фото: Роберт Атанасовски
Од една навидум обична средба на филмска проекција, сега Студентскиот пленум стана синоним за тоа што значи критичка мисла, студентска енергија и бунтовност за правата на младите генерации. Тоа лесно можеше да се види и од начинот на кој зборуваше Грација Атанасовска – со надеж, без страв, со конкретни дела и со активно учество во општеството.
