Центарот на Вуковар. Фото: Ања Владисављевиќ
Претседателот на хрватскиот Уставен суд, Мирослав Шепаровиќ, денеска изјави дека судот донесе одлука според која официјалната употреба на српскиот јазик и кирилично писмо мора да се прошири.
Според одлуката на Уставниот суд од 2 јули, општинските советници во Вуковар, кои му припаѓаат на српското национално малцинство, треба да ги имаат истите услови како советниците од хрватска националност.
Во август 2015 година, Вуковар го смени статутот на градот, според кој „колективните права на српското национално малцинство (на пр. двојазичните натписи на таблите на институциите, улиците или плоштадите) на територијата на градот Вуковар, можат да се обезбедат, дури кога ќе бидат исполнети другите услови“.
Според овие измени, српските советници можат да добијат документи издадени на српски јазик и кирилица, само доколку поднесат писмено барање.
Десничарските партии во градското собрание гласаа за промените во ноември 2013 година, прогласувајќи го Вуковар за „град од посебна важност“, исклучувајќи го од законот за правата на малцинствата во Хрватска, поради она што овој град доживел за време на опсадата. Тој беше речиси целосно уништен од страна на српските сили во 1991 година.
До усвојувањето на промените дојде по неколкумесечни протест поради воведувањето на двојазичноста во службена употреба на места каде, според законот, малцинствата бројат над 30 отсто од вкупното население, што е случај со српската заедница во Вуковар.
Меѓутоа, Комитетот за човекови права и права на националните малцинства на Хрватска, поднесе барање за ревизија на уставноста на статутот.
Со одлуката на Уставниот суд, некои измени беа укинати, па Србите, без разлика дали се советници или обични граѓани, ќе можат да добијат официјални документи на нивниот јазик и писмо.
Шепаровиќ на прес-конференција изјави дека Уставниот суд ја зел предвид специфичната ситуација во Вуковар.
Но, додаде тој, градските власти мора да дејствуваат во согласност со законските одлуки, и во октомври да го известат судот, до каде се со ускладувањето.
„Барањето (според статутот од 2015 година) колективните права на српското национално малцинство да бидат обезбедени кога ќе бидат исполнети други услови, не е прифатливо“, рече тој.
Тој нагласи дека Градскиот совет на Вуковар ќе мора да ги прошири правата на српското малцинство и дека судот нема да толерира какви било одложувања, бидејќи досега ништо не е направено.
Иако експлицитно не нагласи, пресудата може да значи дека Вуковар треба да постави и двојазични табли на зградите на институциите, што пред неколку години беше причина за протести.
