Одбрана на децата од неприфатливи и нагрдувачки идеологии, нивна сексуализација со реформи и учебници од туѓи држави и центри, осквернување на мајчинството и повредување на жената под плаштот на нејзина заштита. Црквата се замолчува и се воведува тоталитаризам што човештвото не го видело до сега.
Ова се пораките од вчерашниот говор на поглаварот на Македонската православна Црква (МПЦ), господин господин Стефан, кој им се обрати на неколкуте илјади верници пред централниот храм во Скопје, на собирот против промените на Законот за матична евиденција и закон за родова еднаквост, кој е во подготовка.
Тој, собирот го нарече бунт против „злото, гревот и смртта во кои, за жал, пред нашите очи запаѓа светот“.
Измените на Законот за матична евиденција предвидуваат трансродовите лица врз основа на изјава да ја променат назнаката за пол во личните документи поради проблемите што овие луѓе ги имале на места, како што се банките или на граница, бидејќи нивниот изглед не кореспондирал со наведен пол во нивните лична карта или пасошот.
Меѓутоа, Црквата, неколку организации и граѓани стравуваат дека со ова на мала врата се протнува можноста за истополови бракови. За нив проблем се и терминот „разновидни родови идентитети“ во новата регулатива за родова еднаквост и одредени образовни реформи.
Протестот почна вчера во 18 часот | Фото: БИРН
Со „Уууууу“ реагираа насобраните на една од последните поенти на поглаварот:
„Без согласност на родителите се делат наставни листови, кои промовираат хомосексуалност и истополови бракови“.
На протестот дојдоа верници од Скопје и од повеќе градови, тие пристигнуваа пред соборниот храм во групи, одејќи зад нивните локални свештеници. Доаѓаа со крст или со икона в раце, беџови на градите со ликот на Богородица, како наметки носеа македонски знамиња – државното и старото со Вергина и маици со натпис „Идентитет“ и „Боже чувај ја Македонија“.
Можеа да се прочитаат транспаренти на кои пишуваше: „Хомосексуалноста е два чекора назад за човештвото“, „Не сакаме мажи во женски тоалети“, „Рацете подалеку од нашите деца“ и „Само девојче може да порасне во жена“.
Доминираа луѓе и политички активисти што се познати по нивните десничарски убедувања и организации, кои во своето работење обединуваат гласност против „пандемијата“, како што ја нарекуваа ковид-кризата, антиваксерство, теории за кемтрелс-траги на небото и антиродови ставови.
„Да сте живи и здрави“, е сѐ што изјави еден од групата седум свештеници со кои се обидовме да разговараме.
Друг свештеник, пак, нѐ советуваше дека подобро е да зборуваме со верниците.
Разговаравме со неколку момчиња од Скопје. Тие дошле на протестот зашто сметаат дека се претерало со трансродовата идеологија, како што велат се „преминале некои граници“.
„Проблем е што денес има помалку луѓе од што имаше на прајдот“, коментираше едно од нив.
Имаше и такви што беа разочарани од нивните духовни отци, бидејќи не ги придружувале на протестот од Охрид.
„Сами како овчички дојдовме“, ни се пожали повозрасна охриѓанка, која во рацете држеше транспарент на кој пишуваше „Сираците од Охрид без татко и пастир.“
Пред официјалниот старт на собирот, на разгласот пред соборниот храм одеше песната „Алелуја“ и водителката читаше извадоци од Библијата што се однесуваат на црковниот поглед за настанокот на човекот или, како што ни објасни еден од поповите – првата глава од Библијата наречена Битие.
„Господ го прати човекот во длабок сон. Па, кога заспа, му извади ребро и местото го пополни со месо. Од реброто Господ Бог создаде жена и ја доведе кај човекот.“
Иконографијата на собирот | Фото: БИРН
На бината, покрај господин господин Стефан, беа останатите владици од синодот на МПЦ, како и католичкиот бискуп на Скопската бискупија, Kирил Стојанов.
„Од ИВЗ срам да им е. Ние сме муслимани и дојдовме од Охрид, а нив ги нема тука“, со ваков приговор ни пристапи една брачна двојка.
Пред собраните говореше и професорката и академик Катица Ќулавкова.
Таа кажа дека она што според неа било благородна идеја за отстранување на дискриминацијата на луѓето „поради нивниот специфичен еротизам“ се претвора во „портал за влез во таканаречен изопачен или квир-свет“.
„Неолибералниот наратив на виножитото требаше да ги сензибилизира луѓето за нијансите на идентитетот со цел да нема дискриминација, за жал во својата актуелна кулминација се чини дека тој наратив на мала врата воведува нова дискриминација – од една страна се залага за бесконечна трансродност, а од друга покажува нетрпеливост кон хетеросексуалните идентитети.“
Ќулавкова се осврна и за начинот на кој се дебатираат овие прашања на социјалните мрежи, опишувајќи ја, како што таа ја нарече, трансродовата концепција како исклучива и конфликтна.
„Секоја критичка промисла за трансродовата идеологија се чита како тенденциозно оспорување на слободата на сексуалната експресија.“
Таа се пожали и дека последниве години поради оваа тема има проблем и со научните истражувања поддржани од западни фондови.
„Или ќе го усвоиш нивниот план за трансродово балансирање, или нема да се финансира проектот.“
Професорката зборуваше и за тоа дека, според неа, во оваа дебата англискиот збор gender погрешно бил преведен како род, бидејќи тој збор во македонскиот јазик означувал нешто сосема друго, односно етничкото и семејното потекло на некој човек.
„А, не на неговите произволни идентитетски проекции.“
Протестот, на кој МПЦ од највисоко ниво се чини исцрта црвена линија во однос на ЛГБТ правата, заврши со настап на вокалното трио „Џентлмен“, кое ја испеа песната „Молитва“ на Виолета Томовска со рефренот:
„Нека биде, о Боже, вечен родот мој. Нека е што не сме ние!“
