Истражувачката репортерска лабораторија (ИРЛ) денеска ја доби првата награда за истражувачко новинарство на годинешниов конкурс на Здружението на новинарите на Македонија (ЗНМ) за сторијата што ја третира набавката на адитиви за јаглен за РЕК Битола и ТЕЦ Осломеј.
Дел од тимот на ИРЛ | Фото: БИРН
„Се соочивме со бројни предизвици, но сатисфакцијата дојде кога нашите наоди не останаа само приказна, туку беа причина за институционална акција. Обвинителството отвори истрага, сега има обвинети 31 физичко лице и пет правни лица за злоупотреба на 6,5 милиони евра од државниот буџет“, изјави Маја Јовановска од ИРЛ.
Признанија за посебен придонес во промоцијата на истражувачкото новинарство добија новинарскиот истражувачки магазин КОД, кој се емитува на Телма, за сторијата што ги обработува тендерите во Државната лотарија, и Александар Димитриевски и Михаил Милошевски од магазинот „360 Степени“ за серијата прилози околу сомнежите за фалсификувани сертификати за англиски јазик на актуелниот директор на Агенцијата за национална безбедност, Бојан Христовски.
Наградата за животно дело „Крсте Петков Мисирков“ годинава ја доби новинарот и колумнист на Призма, Ѕвездан Георгиевски.
Членот на жирито, Герман Филков ги издвои карактеристиките на Георгиевски, кои биле пресудни да биде номиниран за наградата.
„Професионализам, стилистиката, интегритет, активизам и влијание .“
Георгиевски ја почнал кариерата во „Млад борец“, а работел и во „Екран“, „Нова Македонија“, „Вечер“, Радио Скопје, „Пулс“, „Утрински весник“ и неделникот „Глобус“.
Ѕвезан Георгиевски | Фото: БИРН
Познат е како автор на колумната Препознавања, коосновач на радио Канал 4, иницијатор на наградата Роман на годината, коиницијатор на сатиричното списание „Коза ностра“, автор на книги и есеи, и секако коосновач и поранешен в.д. претседател на Самостојниот синдикат на новинари и медиумски работници (ССНМ).
Георгиевски, пак, потсети на едно од неговите први интервјуа, кое како студент го правел со тогашен уредник на југословенската новинаска агенција Танјуг.
„Насловот беше – ‘Да се биде новинар, па нека боли’. И болеше богами, доста, но и ми беше големо задоволство“, накусо Георгиевски ја опиша својата кариера.
За првпат годинава беа доделени и наградите за за најдобра камера и снимателски проект од јавен интерес. Трајче Антоновски, снимател на ИРЛ, ја доби наградата за сторијата „Украдени животи“, додека Иван Поповиќ беше награден за прилогот „Климатски миграции“.
Признанието за најдобро новинарско известување за локални теми ја доби истражувањето на Фисник Џелили, новинар од Порталб за сторијата „Насилството меѓу учениците – сериозен аларм во Тетово “.
Годинава на конкурсот на ЗНМ за сите категории имало 48 пријави, кои содржеле вкупно 99 новинарски производи.
„Новинарството во Македонија е живо и клоца, а новинарите треба да се горди на својата агилност и способност“, заклучи членот на наградната комисија, Филков.
