ФОТОГАЛЕРИЈА: Околу 1.500 мигранти заглавени на меѓуграничниот премин Грција – Македонија

Околу 1.500 мигранти остануваат заглавени во меѓуграничниот појас на Грција и Македонија, откако на вчерашната владина седница била донесена одлука за прогласување кризна состојба во регионот на јужната и на северната граница.

За постапување по одлуката на Владата ќе биде формиран Главен штаб при Центарот за управување со кризи кој што треба да го изготви акцискиот план и да ги реализира предвидените активности.

„Заради зголемениот притисок на јужната граница и сè поголемиот интензитет на транзит преку таканаречениот балкански мигрантски коридор, но и состојбата во глобални рамки, беше проценето дека е неопходна дополнителна и поефикасна контрола на граничниот појас каде се регистрирани масовни нелегални преминувања од грчка страна“, се вели во соопштението од полицијата.

Од невладината организација „Легис“, која на терен им помага на мигрантите, тврдат дека со ова Македонија прави чекор назад.

„Мигрантите секако ќе најдат начин и ќе ги користат нелегалните начини и криумчарите, а тоа нема да можат да го контролираат ниту граѓанските организации ниту пак полицијата, туку ќе биде контролирано од мафијата“, вели Мерсиха Смаиловиќ од „Легис“.

Фотографиите на Роберт Атанасовски сведочат за денешната глетка во меѓуграничниот појас во близина на Гевгелија.