Славко Миловановиќ, пред Судот на БиХ, во февруари. Фото: Марио Иличиќ/БИРН.
Пред Апелацискиот совет на Судот на Босна и Херцеговина, започна повторното судење на Славко Миловановиќ, поранешен припадник на резервните полициски сили на Станицата за јавна безбедност Скелани (општина Сребреница), за злосторства против човештвото.
Со првостепената пресуда од февруари годинава, Миловановиќ беше ослободен од обвинение дека на 8 мај 1992 година, со група припадници на воени, полициски и паравоени формации, пристигнал во селото Решагиќи, учествувал во нападот на селото и наредил палење на куќите, од кои жените и децата биле принудени да излезат.
Повторното судење беше заклучено на денешното рочиште.
На почетокот на рочиштето беше прочитано обвинението, а на прашањето дали Миловановиќ го разбира, тој одговори потврдно, велејќи дека во него „нема А од вистината“.
Обвинителството и одбраната предложија, сведоштвата на одредени сведоци да се репродуцираат, но и да се поканат други, што Судот го одби во првостепената постапка.
Апелацискиот совет ги отфрли предлозите на странките за сослушување на нови сведоци.
„Во однос на предложените сведоци, советот смета дека е непотребно да се повикаат, бидејќи околностите се доволно разјаснети со другите изјави. Тие не се релевантни за случајот и непотребно би ја одложиле постапката“, истакна судијата, Сенадин Бегташевиќ.
Откако обвинителството и одбраната наведоа дека тие остануваат на завршните зборови дадени претходно, изрекувањето на пресудата беше закажано за 15 ноември.
