Пеќ, Косово. Фото: Википедија/Шкурте Рамуши
Специјалното обвинителство на Косово, поднесе обвинение против лице од српска националност, за воени злосторства во Пеќ, во 1999 година, при што биле убиени 33 албански цивили.
Осомничениот, кој веќе е во притвор, а кого српската влада го именува како Зоран Ѓокиќ, е обвинет за воени злосторства извршени врз цивили во Пеќ, во март и во април 1999 година.
Според обвинението, обвинетиот, заедно со организирана криминална група на лица од српска националност, облечени во воени, полициски и паравоени униформи, извршил воени злосторства, при што биле убиени 33 цивили, Албанци.
„Обвинетиот З. Ѓ. во март и во април 1999 година, во населбата Кристал во Пеќ … предизвикал страдање, повреда на физичкиот/менталниот интегритет, заплашување на незаштитеното цивилно население, убиство, грабеж на граѓанин или на место, и наредил раселување на цивилното население или на одредени цивилни поединци, кои директно не учествувале во конфликтот“, се вели во соопштението на Специјалното обвинителство на Косово.
Канцеларијата за Косово и Метохија на Владата на Србија, соопшти дека Ѓокиќ бил уапсен на 1 февруари на граничниот премин Јариње меѓу Србија и Косово, поради сомнение дека извршил воени злосторства.
„Косовската полиција првично два часа го држела на преминот, а потоа, со вооружена придружба, го спровела во Пеќ, додека неговото дванаесетгодишно дете морало да биде сведок на тоа малтретирање, а потоа и само да го продолжи патот кон Косовска Митровица”, соопштија од Канцеларијата.
Во соопштението се додава дека Ѓокиќ е раселено лице од Пеќ и дека неговото апсење е „уште една потврда дека Приштина нема намера да се откаже од кампањата на заплашување на српското население во Косово и Метохија, со злоупотреба на т.н. тајни списоци на осомничени за воени злосторства”.
