Нема официјални информации зошто Србија и Хрватска ги затворија границите само за бегалците од Авганистан, кои останаа заглавени на просторот меѓу Македонија и северниот сосед.
Точно 617 бегалци од Авганистан веќе трет ден се заглавени на граничната линија меѓу Македонија и Србија, во транзитниот центар Табановце. Оваа ситуација настана откако Србија и Хрватска решија да не ги пропуштаат бегалците од оваа азиска држава, иако досега им дозволуваа да транзитираат заедно со бегалците од Сирија и од Ирак.
Никаде нема изјава зошто официјални Белград и Загреб донеле вакви одлуки. Српските власти вратиле околу 350 мигранти, дел се вратени од Хрватска додека цело време пристигнуваат нови бегалци меѓу кои има и луѓе од Авганистан. Од заглавените Авганистанци повеќето се семејства и меѓу нив има околу стотина деца.
„Тука сме веќе трет ден, спиеме на земја. Не ни е јасно зошто не можеме да го продолжиме патот. Немаме никакви шанси да се вратиме во Грција, немаме пари, патуваме цело семејство, осум члена и само враќањето во Грција ќе нè чини по сто евра од човек“, вели Ахмад кој заминал од татковината пред 16 дена.
Бегалците велат дека нема шанси да се вратат во Авганистан, бидејќи таму сè им е уништено.
„Знаеме дека и Грција е во криза, тешко дека и таму би нашле работа. Инаку, би оделе било каде, Германија, Австрија…“
Транзитниот центар е преполн, хумантираните организации делат храна и облека. Неизвесно е што ќе прават македонските власти со Авганистанците и голема е веројатноста дека ќе ги вратат во Грција, бидејќи во Табановце нема капацитет за толку бегалци.
