Вести

Протестите пред Владата разбиени со сила

  •  
  •  
  •  
  •  
  •  
  •  

Протестите по објавувањето на бомбата на СДСМ за убиството на Мартин Нешкоски завршија со разбивање на демонстрантите по улиците. Неколку лица се повредени и пренесени во Клиничкиот центар. Денешните протести беа насилни, со употреба на сила и од страна на полицијата и од дел од демонстрантите.

Полицијата и граѓаните што протестираа пред Владата влегоа во отворен судир, а по еден час полицијата ги растера демонстрантите по улиците.

Полициски кордони ги притиснаа демонстрантите од двете страни на булеварот „Климент Охридски“ и околу 23 часот тензијата се смири.

1

По неколкучасовно скандирање, „убијци“, „човечиња“, „бидете со нас“, тензијата кај граѓаните кои спонтано се собраа на протестите растеше, а сето тоа затскриена го набљудуваше министерката за внатрешни работи Јанкулоска со мобилен телефон во раката.

2

Демонстрантите фрлаа со камења и шипки кон полицијата, а таа возврати со употреба на сила и врз оние групи кои седеа пред Владата со рацете кренати во вис.

3

На протестите пред Владата присуствуваше и братот на Мартин Нешкоски, Александар.

4

Портпаролот на МВР Иво Котевски изјави дека повредени се десетина полицајци, од кои еден потешко.

„Тој е пренесен во Ургентниот центар. Уништени се многу возила, полицајците биле напаѓани, но групата е разбиена“, изјави Котевски додавајќи дека повеќе детали ќе има во текот на утрешниот ден.

Котевски не соопшти колку демонстранти биле повредени на денешните протести, ниту пак колку се уапсени.

5

БИРН дознава дека во Клиничкиот центар се донесени четири лица, од кои двајца демонстранти и двајца полицајци. Тие немале потешки телесни повреди, туку биле во шок.

6

Екипата на БИРН беше сведок кога еден од демонстрантите падна на земја, но полицијата не дозволи да му се помогне. Полицајците ги разбркаа присутните и рекоа дека сами ќе му помогнат на повредениот кој лежеше во близина на Владата.

7

Во текот на протестите запалени беа неколку контејнери. Шипки, јајца, кутии и шишиња постојано летаа кон зградата на Владата и кон полицијата. Зад кордонот на полицијата следеше и возило опремено со воден топ.

Во центарот на Скопје се уште е видливо засилено полициско присуство, а пред Владата остана ѓубрето што демонстрантите го фрлаа кон полицијата.

Последните информации се дека во тек е апсење на демонстрантите.

8

Протестите ги следеа и двајца набљудувачи од ОБСЕ.

На видеото подолу е регистрирано како протестите од мирни наеднаш стануваат насилни.